初四山頂遊

本身諗住坐山頂纜車上去,點知去到纜車站超多人!
後尾又唔識搭車wo...
我印象中係舊天星馬頭有巴士搭上去
於是就搭左一個站0既地鐵去舊天星到搭上去lu!

冇帶400d出去,不過今晚好大霧!好多霞氣!好懞,又冇腳架,就算帶左都冇咩作為!

雖然係大霧,不過d夜景都仲好靚,但左邊果幾幢樓好礙眼.....
點解要起咁高wo!

自拍night mode...勁手震...

烜幫我影的,好黑下...

今晚發生左d事...

希望真係玩,唔係真....

新年

新年又係大家聚首一堂0既節日了!
除左阿婆生日,咁齊人之外,就係新年先會咁齊人
初一一如以往,一早起身,收左阿爸,阿媽封利是就去飲茶,跟住入青松觀喇
每年去到都好熱鬧!
阿姨,表姐,個個都係坐定定,我地就一個一個咁排隊拎利是!
場面非常之咁攪笑!
跟住食完齋就成三十幾人一齊去太和,迫入阿婆間屋到玩呀,打牌呀
真係好熱鬧!
阿婆精神好好!不過唔知佢仲認唔認得我呢?!
個個孫仔孫女都祝佢身體健康
唔知我老左0既時候,又有冇咁多人會黎睇我呢?!

新年真係好多戲睇!
赤壁就麻麻啦!
今日睇左奇幻逆緣,真係好好睇!
好感人!睇完個心好那住那住!
我都係鍾意睇呢d戲多!
男主角同女主角真係好有緣
佢地雖然離開左佢地認識0既地方咁耐
但係都仲咁掛住對方
令我諗起我同德國仔之間......
雖然佢上年黎過搵我...但係...我覺得自己好衰...
點解會對佢咁冷淡?!
我都唔知....好難得先見到面...
但係我同佢食左個早餐就走左喇.....
攤凍左0既感情好似好難再番熱....
呢次見面之後,我諗我呢世都唔會再有機會見到佢lu....
始終大家都生活係唔同0既地方....算係一個浪漫0既經歷囉....
講番套戲...男主角同女主角都好靚!!佢地好襯!
套戲真係好浪漫!!渣船出海,0係沙灘到玩,仲有係個碼頭到睇日落,
呢幾個鏡頭真係拍得好靚!哈哈,我係個女主角都冧死!(當然要同自己鍾意0既人一齊先係啦,同個冇feel0既話...去邊到都悶...hehe)
套戲都有少少titanic feel!又係個女主角老左,講番自己後生時0既愛情故事!


新年假仲有4日就放完,好唔捨得呀!!!
人就係咁貪心架喇!!假都未放完就唔捨得!
或者因為呢間公司太地獄啦!

手痕痕,技癢癢

好耐冇拎過部機喇!!
dslr帶出街,真係唔太方便!
casio dc仔又係踩單車時跌爛左wo!
咁點算好呢??
係屋企見到家姐男友部dc仔...嘿嘿!
家姐又出左trip...部機都冇人用架啦!呵呵
等我帶佢出去散下步啦!!
開機同熄機都好快!
其實我之前去布吉時都問佢借過,因為係防水架!可以落水影相!
唔錯唔錯!
就快新年了!唔知到時盤水仙多唔多花呢?!

等lift時影的!hehe有人曬咸魚!

點解老窩成日都係咁塞架?!

永遠都好鍾意搭巴士睇風景!!!周圍望!

呢棵野真係好攪鬼!生到咁高!!

呢個教堂好外國feel!

咩話?!塞到天黑??nonono!呢張係我回程時影0既!

又番到沙田了!

第一次..碰碰車

琴日係渣車0既三年黎...第一次撞車
過左差唔多兩日,件事都仲不停係個腦到浮現出黎!
事緣琴日朝如常渣車番工...
去到火炭大排檔對出個燈位,見黃轉紅,咪收慢停車,
我次次燈位停時都有望後面睇下有冇車架,望倒後鏡,
見到有架小巴係遠處埋緊黎,心諗佢仲有一段距離,
都停得切啦我咪望番前面囉,
果頭未完...3,4秒之後望到塊鏡已經見到架小巴係正後面...
砰一聲撞埋黎.....>__<
成架車俾佢推前....我對腳飛起左....
果個情景到而家都仲好深刻!!!!
落地時...架車訓左係到...但我個人都仲係垂直坐左係架車上面....仲要坐得好正.....
成個人呆左幾秒...坐左係到唔知點算...
個小巴司機完全冇意落車...我企左係到...陣係feel到個pat有少少痛...
其他地方都冇事,成個過程係好慢,
佢架車冇凹,我架車花左少少跟住我咪自己搬番起架車...
不過唔夠力....個小巴司機先落車幫我托番起佢...
跟住佢問我"冇咩事丫ma?冇事就得喇,咁快d開車走喇,唔好塞住人"
頂佢!!佢想當冇件事發生!!!跟住我話"下?你撞到我wo"
之後佢又問咁你有冇事丫?要唔要報警?我冇咩所謂架!你話報警咪報警囉"
但我最衰就係...架車個行車証過左期...
其實續左架喇..不過一路都唔記得貼番上架車到...
陣係帶住左係身...所以咪一心唔想報警囉....
我諗住打俾我個fd問應該點處理...
畢竟我都未試過...點知佢電話冇人聽...
小巴司機又話"你打電話即係報警啦?"
佢仲要笑笑口咁講....
跟住我話"唔係呀,我打俾我朋友睇下應該點先呀"
之後佢話"咁唔報警既話一係賠錢囉,你想賠幾多丫??你話事啦,我冇所謂"
跟住佢話賠一千...其實我個人仲係好呆...
又諗唔到點...咁見架車又唔係好花...個人又冇咩事,咁咪一千蚊囉...
收左錢之後就開車走喇...

諗諗下...又冇抄低佢車牌...又冇留電話...乜都冇好似好奇怪咁...不過果時又趕住番工....怕遲到...是但啦....唉!!真係超黑....
到放工時...見到架車冇啦啦訓左係到...個車尾燈爆左!!!
頂...應該係d貨車整跌左....唉!撞車都冇事...竟然好地地..泊車就整爛...

到而家個pat pat仲好痛...原來瘀左一撻...
唉!

內疚感....

事隔左3年幾喇...

因為我個email已經累積左成二千幾封unread...
今日的起心肝...清晒佢!
每次清email,我都會將d藉得留起0既,keep住係inbox到...
而每次清完...我都會番睇呢d email....
其實點解仲會番睇呢??
我都唔明...
每次睇到某一個email...我都會忍唔住喊....
今次冇喊到出黎...只係個心好酸..."那"住"那"住...呢種感覺一d都唔好受...
我覺得自己當時好衰...
點解會咁...點解會做d咁0既野...
好後悔....點解唔好好地咁一直落去....
每次睇親都覺得好內疚...
其實keep住都仲有同佢聯絡,不過好少出黎
係前果排話出黎食飯...都冇左件事了!

希望快d搵到佢0既幸福

08年貓事回顧

08年,係一個多事之年!
係我身上面亦發生左好多野!

-搵到個興趣,性格都好夾0既人,可惜亦因了解而閃電分開
-屋企0既第六者介入....頭家差d散咁滯!至今好似都未解決!!
-第二次辭職!亦搵到份比之前更地獄0既工!簡直係同番小學一樣!d訓導主任好嚴!
-開始收第三,第四張紅色炸彈!何小姐同陳小姐都升做太太級!
-身邊好友陸續分手...單身人士聚會極其頻密!
-學習方面呢.....都係經常半途而廢...學唱歌...學學下冇學lu,家下學書法...唔知又可以學幾耐呢?!
-爆瘡!呢個煩惱希望今年可以解決!!塊面唔知攪咩不停咁爆!
-家姐傳出婚訊!將會係09年尾註冊擺酒結婚!!好野!!佢終於都嫁得出喇!
-爸爸發現有初期0既心臟病,佢越黎越多病痛了!
-墾丁之旅,不停食食食!去旅行真係好開心!

希望好開心0既事可以係呢年發生得更加多!
唔開心0既事就唔好拖落呢年到!
呵呵呵,希望可以同我0既機會發展!!hehee,不過依然係好被動,唔敢行第一步......
希望身邊既好友快d得到幸福!!!