親自下廚

上兩個星期有日出左街,
打俾媽問佢今晚幾點番,佢問乜事呀?!
冇啦啦up左句..冇呀,想煮飯咋ma,你番唔番黎食?!
佢話,嘩!咩事煮飯?!佢又問埋爸爸,結果佢地都番黎食!
再打去問家姐,連未來姐夫都食!
哈哈!結果要煮6個人既飯!可能e排都冇住家飯食,所以個個都想番屋企食下飯!
以前間唔中都有煮下野食,不過次次都係亂黎
因為多數都係俾自己食or第二日帶飯,求求其其買d野煮下啦
今次要煮俾人食,哈哈,都係煮番d basic d,唔會難食得去邊既野啦!
結果去左街市買左雞奕,白菜仔,蕃茄,豆腐,魚尾
d野好重呀!!我仲走去m記拎左d茄汁!哈哈,因為屋企冇茄汁,同埋買一支既話又一定會放到過期都唔用!所以去m記拎!
唔知點解....已經由5點幾開始煮架啦!煮到8點先至攪掂晒!
但係煮完....又唔記得試味!哈哈!d蕃茄蛋淡左d!d湯就0岩0岩好夠味!
個白菜仔冇乜特別啦!
因為阿未來姐夫冇膽....佢斬左料上黎囉-_-
雖然d賣相好差,但係d味道都唔算難食丫!哈哈!我話既!!!
d雞奕都幾好味!哈哈
但係媽番黎話冇胃口......
我就筆左碗湯俾佢...話係我煲既,冇胃口都要飲
佢就飲左幾啖....
佢話,平時又唔見你煮飯!而家先煮!如果係平時煮我就開心!但係我真係冇胃口食呀
我聽完個心好唔舒服
自問真係唔係一個孝順女
但係而家大個左,就開始覺得媽咪好重要
有時望到佢,佢d頭髮越黎越白
d皮膚越黎越鬆
有時好有衝動想去攬實媽咪
但係e個行動,太肉麻,我做唔出!
男女朋友愛既表現可以好輕易表達出黎
但係對屋企人既愛,唔知點解,我覺得好難表達出黎
好多時都會收收埋埋!
好難踏出第一步!
就算開口話一齊去飲茶,我都覺得唔好意思!
但係個心其實都想!
點解會咁既呢?!
我都開始改變e樣野架喇!!
我唔想愛得太遲!